Nalalapit na naman ang Pambansang Halalan sa 2010, at kahit ang bansa ay ginulantang ni “Ondoy “ di pa rin pahuhuli ang usapan sa Pulitika. Nakahelera na sa kanilang mga pakulo at publisidad ang mga gustong umarangkada ang “PR sa mga Juan De la Cruz ng bayan para makamit ang suporta ng mga manghahalal. Tila “sarsuwelang giba-giba” na naman ang pedestal ng larangan ng kampanya sa halalang darating, na ang simula ay ang pagpapahayag ng kakayahan laban sa kapasidad upang pondohan ang haharaping kagastusan na siyang litaw na pormularyo upang makamit ang hantungan ng pagwagi sa labanan ng matitikas na kandidato.

    Ang maganda lang at nakapagpapasigla ng damdamin ay ang pagdagsa ng mga bagong botante sa mga araw na itinakda ng pagpaparehistro. Karamihan sa mga bagong botante ay nagpapakita ng kabukasan ng pag-iisip upang makasali sa pagpapasya sa halalang darating. Karamihan ay mga kabataan na ngayon ay nauunawaan ang kahulugan ng karapatan sa pagpili ng mga uugit ng Pamahalaan. Taglay na ang responsibilidad at kabukasan ng kaisipan hinggil sa mga isyu ng kailangang lingkod-bayan. Nakakatuwa rin ang mga pananawna ibinabahagi sa kanilang kabatiran ukol sa mga di dapat na mga lider lalo na yaong pagkakilala sa mga tradisyunal na Pulitiko (TRAPO). Yung mga pulitikong ang pangunahing pinupuhunan ay kalansing ng salapi, mga ngiting pakunwari, bating malagihay, tila makatotohanang boladas at nagtataglay ng pasuli-suling pakikibagay.

    Naranasan na ng bayan ang ilang dekadang pamamayagpag ng mga Pulitikong nagtataglay ng binabanggit na mga katangian. Nakita na rin natin kung ano ang kaya lamang nilang gawin sa likod pagkatapos ng kanilang mga pakunwaring malasakit, na sa bawat ngiti ay naroon ang pagsasamantala. Na ang kahungkagan ng talino ay nagagawang makuha ang posisyon kung kaya ang tungkulin ay nagiging hanapbuhay sa halip na malasakit at paglilingkod.

    Tama ang ipinapakitang ehemplo ng bagong mga botante na tapusin na ang panahon ng mga pulitikong asperante sa panggogoyo. Mga pulitikong nagtatago sa nakakagiliw na mga panlabas na dating maka-masa.Susukatin ng bayan ngayon ang kanilang kakayahan. Paghahambingin ang kanilang mga “performance” upang Makita natin sa likod ng tradisyon ang katotohanan. Ibibilad ang mga nakatagong kalawang sa makinang na tubog sa gintong gayak ng mga pagkato ng haharap sa bayan. Doon ang bayan mismo ang tatapos sa panahon ng mga Tradisyunal na Pulitiko sa ating panahon. Sapagkat ayaw na mismo ng bayan sa mga basahang TRAPO.